خطير (1)

مساء الخير

مساء سوري ..رمضاني الاجواء ...

من حديقة منزلنا ..

بقرب ياسمينة زينها بياض بعض الزهرات ...

تحت سماء صيفية هادئة ....

على كرسي خشبي قديم ....

مع كوب ساخن من القهوة ....

أسير بقلم أزرق على صفحة بيضاء من دفتري الصغير …

موضوع: خطير (1) الإثنين أغسطس 31, 2009 7:28 pm

هل فتاة النت فتاه سيئة ولا يفضلها الشباب ؟

فتاة تكتب في منتديات الانترنت ::

أتت اليها أمها ووجها يتهلل بالبشر. وقالت بنيتي :

لقد جاء فلان وابنه لخطبتك

الفرح أخرس لسانها ونطقت عيناها ببريق السرور ..

الأن سيتحقق حلمي أبني بيتا من السعادة وأربي جيلاً يكون قطعة مني..

أربيه على ناظري..

يكون عونا لي في الدنيا وذخرا لي في الأخرة ..

لم تبت تلك الليلة فهي لاتحتاج النوم بعد أن تحولت أحلام نومها إلى حقائق..

تداعب يقظتها ،وافق أبوها على الخطبة وتمت الرؤيه الشرعية..
سر بها العريس وسرت به وابتدى الجميع يوزعون خطابات الدعوة لليلة الفرح الموعودة ..

وفي اليوم التالي :

ذهب العريس إلى عملة أخبر بعض أصحابه بأنه سيتزوج إبنة فلان بارك له الجميع .

وفي اليوم التالي :

جائه أحد زملائه وقال له: (( الله الله أنت ستتزوج الكاتبة الفلانية التي تكتب في المنتدى الفلاني )) ..

نظر العريس إلى زميله متعجباً !! عن من تتحدث !!

وماهذا الكلام ؟

قال زميله خطيبتك كاتبه في منتدى بالإسم الفلاني.

قال وماأدراك ومن أعلمك ؟

قال أختي تعرفها، وهي تكتب بإسم مستعار ..

أتريد أن نفتح المنتدى لنشاهد مواضيع خطيبتك ؟

قال العريس والعرق يتصبب ولما لا ؟

فتح الزميل المنتدى إستخرج بالبحث جميع مواضيعها..
ثم بدأ الاثنان في التصفح فهاهي ترد على فلان...

وتشكر فلان ..

وتتناقش مع فلان ..

وتضحك من طرفة فلان ..

وهذا فلان يمدح ماتكتب ... ويثني على ماتقدم ...

وهي ترد عليه بالثناء والشكر ..

إحمر وجه الخطيب وخرج من المكتب واتصل ببيت خطيبته وقال لأمها :

هل تسمحين لي أن أكلم خطيبتي ؟

قالت امها لامانع ..

أخذت البنت الهاتف وقلبها يخفق ويداها ترتجفان ..

تخشى من سماع الكلام المعسول أو أن لاتملك القدرة على الرد وهو يحدثها عن بيت المستقبل ؟

لكنه فاجاءها بسؤال واحد :

هل أنتي الكاتبة الفلانية في المنتدى الفلاني ؟

قالت : نعم أنا هي ..

قاطع حديثها وقال : أسف انا لا أتزوج (( فتاة إنتر نت )) وأطبق السماعة!!!؟؟؟؟

حالة قد تمر يوما ما على فتاه... فما موقفكم ؟

وما هو رأيكم السؤال مفتوح للشباب والصبايا...............

هالة

موضوع: رد: خطير (1) الإثنين أغسطس 31, 2009 10:16 pm

حالة قد تمر يوما ما على فتاه... فما موقفكم ؟

عــــــــــــــــــــــادي .... الله معــــــــه ...
بكون شخص متخلف ومعقد ... وشخصيته مهتزة ... وهيك شخص انا مابتحملو ..
ولا بزعل عليه لحظة .... وبحمد ربي كمان انه ماوقعني مع هيك شخص ...

وشو يعني اذا عم تكتب مواضيع .. وترد .. بمنتديات ..
مو احسن ماتكون بنت مو مخليه شب عالفون وطلعة معو كمان ,, وهوي غبي ومو عرفان ..

في ناس مابتلبقلها الصراحة ..
وهيك ناس بتتعب بحياتها كتير و بتعب اللي معها كمان ...

وبعدين شو هاي فتاة انترنت ... اي شو فتاة شوارع يعني !!
قمة التخلف ... مابدي

تقبلي مروري ....

موضوع: رد: خطير (1) الثلاثاء سبتمبر 01, 2009 12:36 am

أنا مع روزي 100% ..

هيك شخص أسمو معقد و متخلف .. ورح يعذبها كتير أثناء الحياة الزوجية ..

بلاه أحسن .. رب العالمين بيعوضها بأحسن منو ..

تحياتي

موضوع: رد: خطير (1) الثلاثاء سبتمبر 01, 2009 2:03 am

الله مع دواليبو ما عاجبو

اي على قولت روزي لالا اي شو فتاة شارع يعني .... على الاقل عم اعمل شي قدام ملايين الناس وبدون خوف ...

مو احسن ما كون مرافقة شباب من ورا ضهر الكل ....

شو هالمعقد هااااااد ... شو مافي غيرو يعني ... في كتير شباب فهمانين ومثقفين وبيكون شايفين حالهم انو خطيبتهم فلانة الي بتكتب بالمنتدى الفلاني لانها مثقفة واخلاق و و و و ...

تقبلي مروري

موضوع: رد: خطير (1) الثلاثاء سبتمبر 01, 2009 2:17 am

فعلا انا بوافقكم الرأي
وتحمد ربها ساعتها انو ريحها منو
عنجد بكون كتير متخلف ومعقد
والعيشة مع هيك انسان بتكون عذاب

تقبلي مروري

موضوع: رد: خطير (1) الثلاثاء سبتمبر 01, 2009 5:31 pm

روزي قالت :
عــــــــــــــــــــــادي .... الله معــــــــه ...

مستر جي تي قال :
بلاه أحسن ..

وردة قالت :
الله مع دواليبو

متيمة سوريا قالت :
والعيشة مع هيك انسان بتكون عذاب.

شكرا ً لمروركم جميعا ً ..

أما عن رأيي أنا فهو بديهي أن يكون من رأي البنات .. ضد هذا الانسان ..

و لكن السؤال موجه للشباب .. يالله يا شباب عطونا رأيكم فينا ..

موضوع: رد: خطير (1) الأربعاء سبتمبر 02, 2009 5:14 pm

انا بضم صوتي لصوت روز والحمد اللة اللي كلن هلق موبعدين

موضوع: رد: خطير (1) الخميس سبتمبر 03, 2009 3:11 am

رداً على سؤال هالة عن رأي الشباب فيكن أنتن الفتيات .. فتيات الانترنت و المنتديات ..

أنتن عزيزاتي بمثابة صديقاتي المفضلات .. و إذا ملاحظين في حرية بالحكي بيني و بينكن .. و هذا الموضوع أكبر مثال .. مين فيها تسأل أي شب بالشارع "شو رأيك فيني ؟" .. !!
يعني مستوى حرية الكلام هون مرتفع .. و هذا الأمر عم يعطينا "الشباب و البنات" تجربة كبيرة و عم تنعلم عن الصعوبات اللي عم تواجهها البنات في الحياة و الله يعينكم عنجد ..

آخر شي أنا ما بعارض صداقة الشب و البنت ضمن حدود طبعاً .. و الانترنت أعتقد أفضل مكان للتعارف و الصداقات طالماً ما بتجاوز حدود الكلمات .. في حال تجاوزت حدود الكلمات فالأمر صار محكوم وفقاً لتربية البنت .. و البنت السيئة سيئة وين مكان و البنت الآدمية آدمية وين مكان .. مو بس عالنت ..

كترت حكي أنا ..
المهم تكونو فهمتو علي ..
تحياتي
علاء

موضوع: رد: خطير (1) الخميس سبتمبر 03, 2009 6:20 pm

[b]شكراً لمرورك .. زرقاء ..
...............................................

مستر جي تي قال :

" أنتن عزيزاتي بمثابة صديقاتي المفضلات .. و إذا ملاحظين في حرية بالحكي بيني و بينكن ..
و هذا الموضوع أكبر مثال .. مين فيها تسأل أي شب بالشارع "شو رأيك فيني ؟" .. !! "

سيد علاء .. ( اسمحلي ناديك باسم توقيعك ..)

ما في شك أن صداقتك لنا أمر نعتز به ..( أنا عن نفسي و عن بنات المنتدى ).
صداقة قائمة أولاً .. على الاحترام المتبادل ..و ثانياً التقارب الفكري .. ( لتقارب الأعمار .. )
و ثالثاً لتقارب البيئة ( أغلب المنتى حماصني .. من دوني للأسف .. بس عزائي إنو نصي حمصي .. البنت بتطلع لأمها .. )

فهي صداقة فكرية .. و لنسميها إصطلاحاً ( صداقة النت .. ) ..

أنا شخصياً أومن بها بالحدود التي رسمناها .. و أتعامل مع الأشخاص كما يعرضون من أفكارهم .

ولا أخلط الأمور ببعضها .. فصداقة النت .. هي صداقة نت ..

وصداقة الواقع أمر آخر له مقوماته.. و أحكامه.. و حدوده..

( سأفرد له موضوع خطير آخر لاحقاً باذن الله .. )

مستر جي تي قال :

" البنت السيئة سيئة وين مكان و البنت الآدمية آدمية وين مكان .. مو بس عالنت .. " .

هذا الكلام سليم .. لنعد للقصة ..

البنت من الناحية الواقعية الحقيقية هي بنت عالم وناس و آدمية و مشان هيك خطبها الشب ..

ولكنه وجدها ( من وجهة نظره طبعاً ..) سيئة من خلال صداقاتها على النت و مشان هيك رفض الزواج بها ..

هو لا يدرك أن هناك فرق بين شخصية البنت على النت و شخصيتها الحقيقية ...

فلنفرض جدلاً أنني أنا هالة .. اكتشفت أن أحد شباب المنتدى يدرس معي في نفس الكلية ..

هل من الفروض أن يكون صديقي في الواقع مع أنه صديق نت ..

أنا أقول ليس بالضرورة ..

فإذا كانت هناك ظروف مواتية و كانت شخصيته الواقعية تتناسب مع المعايير التي أقييم بها الأشخاص الذين أصادقهم .. فالأمر مختلف ..

أطلت عليك مستر ..

شكراً لمساهمتك ..

موضوع: رد: خطير (1) الجمعة سبتمبر 04, 2009 1:40 am

والله موضوع رائع ومتميز مشكورة علىى ردود

موضوع: رد: خطير (1) السبت سبتمبر 05, 2009 1:33 am

يعطيكم العافية جميعاً طيب وهاي أنا كمان أجيت أعطي رأي بناءً على طلب صديقتي هالة ......

بس قبل حابب بس علق على موضوع صغير لهالة أكتر من موضوع شوفك كاتبة فيه كلمة أنو الكل حماصني بدوني أنا وللأسف هلأ هالكلمة ليه للأسف ما فهمت ليه .. على كل حال مو موضوعي بس أنا حابب خبرك (هون بالمنتدى في خمس صبايا من الشام و3 شباب من الشام ) بس هني موجودين بسوريا إجازة ووقت الإجازة ما بيدخلو على الانترنت وهاد السبب الي خلاكي لسا ما تتعرفي عليهم والشباب نفس الموضوع ما عدا حبيب الكل موجود بينا وعم يدخل وهو كمان من الشام ....... عدا عن هيك معنا من فلسطين Hardway والصبية شي خطير وغيرهم كمان مو بالذاكرة حاليا .... يعني المنتدى بيضم من أكتر من دولة مو بس من حمص (للأسف)!!!! وهاد شرف كبير إلي أنا شخصيا وأكيد كمان للجميع بأنه هالمنتدى تكبر عيلتو وتصير عيلة دولية بضم أناس رائعين من كل مكان ... بتمنى المعلومة تكون وصلتك ونحنا هون مو بالجنسية وبالمكان كلنا عرب وكلنا أخوة ما بيهم هاد من وين وهداك من وين ...... وبعتزر ع الاطالة بالنسبة لهالموضوع......

هلأ بالنسبة للموضوع عن شو رأي فيكم أنتو صبايا المنتدى ..... متل ما قال اخي وصديقي علاء .. أنا وعلاء أصدقاء كتير وهو بيعرف شادي كيف نفس الشي هلأ انا بعرف بنات كتير عن طريق النت وبحترمهم وبقدرهم وهني بيبادلوني نفس الكلام ... أما عنكم أنتو شخصياً الي موجودين بمنتدى سحر سوريا .. كمان بحترمكم كتير وبقدركم وبعتبركم أصدقاء إلي ونفس الكلام الي قالو صديقي علاء انو معقول هيك من الشارع تجي تقوليلي شو رأيك في .. يعني علاقتنا هون بالمنتدى مبينية على صداقة بإحترام وإخلاص وثقة ببعضنا انو عمرنا ما رح انفكر ببعض اي تفكير غلط ... وانا معك بنقطة كمان انو مو بالضرورة يكون حدا هون بالمنتدى يطلع زميلك بالجامعة عادي صداقة النت شي وبرا النت شي تاني ... وبالنهاية منرجع لنقطة كتير مهمة وانا كتير باخد فيها ... الشب او البنت الاتنين احترامهم وادبهم وشخصيتهم بيفرضوها على النت وخارجه....

بعتذر عن الاطالة وبتمنى تكون وجهة نظري والمتقاربة لالكم عامة تكون وضحت

وشكراً

موضوع: رد: خطير (1) السبت سبتمبر 05, 2009 4:59 pm

أولاً : بدي أشكر الحمصي لمروره العطر ..
شكراً لمرورك الحمصي .. نورت ..
.....................................................................
ثانياً : أمير الرومانسية ( الأخ شادي ) ..
أنا قلت " ( أغلب المنتدى حماصني .. من دوني للأسف .. بس عزائي إنو نصي حمصي .. البنت بتطلع لأمها .. )"
أولاً:
الأسف هنا يا سيد أمير نوع من المديح و ليس الذم .. يعني الجنسية الحمصية ( على قولة الماما الحمصية )
ما بتصير لمين ما كان .. والدليل إنها مدح .. إني عزيت نفسي بإنو نصي حمصي من طرف الوالدة ..
ثانياً :
أنا قلت أغلب و ليس جميع .. مع إحترامي للجميع مهما كانت الجنسية ...
ثالثاً:
الشاهد هنا لوصف أثر البيئة المشتركة بتكوين الصداقة ..
رابعاً:
ما عاذ الله إني كون عم إنتقص حدى مهما كانت بيئته أو جنسيته .. هذا ليس من طبعي أو أخلاقي .. أو ديني ..
خامساً :
من كتر ما بحب الحماصني .. و خصوصاً بيت جدي القديم بحي بني السباعي بحمص ..يحق لي أن أقول للأسف ..
فهذه مشاعري ..
سادساً :
إذا انفهمت كلمتي خطأ... فأنا بعتذر من كل أحد فهم قصدي بالخطأ ...
هذا للايضاح ... أرجو أن تكون وصلت الفكرة ..
.................
..............
...........
......
....
..
عاشراً و أخيراً ..
شكراً لمرورك أمير ..
و رأيك فينا حاسينو من ردودك المحترمة .. ولكن الموضوع طرح لنقاش هذه الفكرة .. الموجودة عند بعض الناس ..

نورت سيد شادي ..

موضوع: رد: خطير (1) السبت سبتمبر 05, 2009 7:29 pm

يااااااااااااااااخ روقي شوي هالة هدي أعصابك والله أنا ما قصدي شي من كلامي ...

ويمكن بس أنا فهمتك غلط بس مو متل ما إنتي جاوبتي ... كل الموضوع أنو فكرتك أنو عم تقولي أنو كل المنتدى حماصني مافي غيري أنا نصي حمصي ونصي شامي وكلمة للأسف ...
اولاً حبيت أعرف شو يعني كلمة للأسف ... ووصل الجواب مشكورة ... ثانيا حبيت وصلك معلومة انو بالعكس في كتير شوام ومن بلدان كتير معنا هون بالمنتدى بس هني بإجازة ما عم يدخلو هلأ .. هاد بس المقصد انو فكرتك مانك عرفانة لحتا مدايقة انو للاسف مافي غيري اتاري قصدك بكلمة للاسف هي تعزيت نفسك ...

الله يسامحك هيك بدي ازعل منك .. انا ما قصدي دايقك او زعلك بس حبيت وضحلك موضوع فكرتك ما بتعرفيه .. وحبيت افهم معنى كلمة ..

على كل حال وانا اسف اذا دايقتيك بأسلوبي بس صدقيني ما قصدي شي ..... وبجد أنا بحترمك وبحترم الجميع هون مو لكوني صاحب الموقع والمنتدى او مدير بل أنا بعتبر حالي عضو بينكم متلي متلكم .. لدرجة انو عم شارك معكم ومنكم وفيكم مو متل اصحاب المنتديات بالعادة .... وبقدم اعتذاري مرة اخرى منك اختي وصديقتي العزيزة هالة ...ومستني ردك لانو بجد ادايقت انك فهمتيني غلط

موضوع: رد: خطير (1) الأحد سبتمبر 06, 2009 1:43 am

الصراحه معكون حق

الله معو على قولتكون

تقبلي مروري

موضوع: رد: خطير (1) الأحد سبتمبر 06, 2009 4:30 pm

سيد شادي ..

حا جاوبك على طريقة باب الحارة ..

صغيري ...صغيري و مو حرزاني بنوب .. إنتي أكبر من هيك بكتير .. بكتير .. أهلين قبضاي ........... ههههههه

عرضية أمير و إذا ما صار في أخذ و رد بيناتنا ما إلها طعمة المنتديات .. مو هيك ؟؟

( الأنسة هـــالـــــة )

موضوع: رد: خطير (1) الأحد سبتمبر 06, 2009 4:35 pm

نورت حبيب ..

شكراً لمرورك ...